UEFA-nyň Çempionlar ligasynyň birinji tapgyry täsirli oýunlar we rekordlar bilen tamamlandy.
“Mançester Siti” öýünde “Napolini” 2:0 hasabynda utdy. Erling Holand Çempionlar ligasynda 50-nji goluny geçirip, bu görkezijä hemmelerden çalt ýeten oýunçy boldy.
21-nji minutda myhmanlar kapitan Jowanni Di Lorenso meýdançadan çykarylandan soň, on bolup galdy, ýöne derwezeban Wanýa Milinkowiç-Sawiçiň kömegi bilen uzak saklandylar. Diňe ikinji ýarymda Holand Fil Fodeniň topy bermeginde kelle bilen gol geçirdi. Tiz wagtdan Jeremi Doku ikinji goly girizdi.
Angliýada “Barselona” “Nýukasl Ýunaýtedi” 2:1 hasabynda utdy. “Barsanyň” täze oýunçysy Markus Reşford toparyň düzüminde ilkinji goluny geçirdi we tiz wagtdan öz hasabyna ikinji goly ýazdy, bu hem topara ýeňiş getirdi. Hüjümçi Çempionlar ligasynda “Barselona” üçin gol geçiren ilkinji iňlis oýunçy boldy. “Nýukasl” diňe oýnuň ahyrynda Entoni Gordonyň kömegi bilen bir gol salyp bildi.
“Barselona” Reşfordy “Mançester Ýunaýtedden” şu tomus kärendesine aldy. Şertnamada satyn almak mümkinçiligi-de bar. 27 ýaşly winger Çempionlar ligasynda “Barsa” üçin oýnan taryhda ikinji iňlis boldy. Birinjisi Gari Lineker bolupdy. Ol toparda 1986-njy ýyldan 1989-njy ýyl aralygynda oýnady.
Indiki oýnuny kataloniýalylar 1-nji oktýabrda “PSŽ” bilen geçirer.
Oýun güni diňe “Kopengagen” (Daniýa) bilen Lewerkuzeniň “Baýeri” (Germaniýa) deňme-deň oýnady – 2:2. Galan üç oýun uly ýeňiş bilen tamamlandy. “Brýugge” (Belgiýa) “Monakony” (Fransiýa) 4:1 hasabynda utdy, “Sporting” hem şeýle hasap bilen “Kaýrat” toparyny (Gazagystan) utdy, “Aýntraht” (Germaniýa) bolsa 5:1 hasabynda “Galatasaraýdan” (Türkiýe) üstün çykdy.
