2021-nji ýyldan bäri YouTube kontent awtorlaryna, artistlere we media kompaniýalaryna 100 mlrd dollardan gowrak töledi. Bu barada wideohostingiň wekilleri Nýu-Ýorkda geçirilen Made on YouTube çäresinde habar berdi diýip, Deadline belleýär.
2024-nji ýylda platformanyň mahabatdan gazanan girdejisi 15% ýokarlanyp, 36,1 mlrd dollar boldy. Bu mukdardan 45%-i kanal eýeleriniň arasynda paýlanýar. YouTube-yň maglumatlaryna görä, diňe platformany goldaýan telewizorlarda tomaşalaryň hasabyna ýylda 100 müň dollardan gowrak gazanýan kanallaryň sany geçen ýyl bilen deňeşdirilende 45% artdy.
Made on YouTube çäresinde kompaniýa döredijiler üçin täze gurallary hödürledi. Olaryň arasynda gysga wideo hyzmaty Shorts üçin EA funksiýalary bar. Indi awtorlar işlenmedik kadrlary EA-nyň kömegi bilen redaktirlenen wideolara öwrüp, şeýle-de aýdym, geçiş we ses goşup bilýär.
Mundan başga-da, YouTube Shorts-a DeepMind-dan Google Veo 3 Fast wideo döredijisiniň birleşdiriljekdigini yglan etdi. Gural animasiýa goşmaga, stil üýtgetmäge we sahnalara başga elementleri goşmaga mümkinçilik berer.
2025-nji ýylyň aprelinde YouTube 20 ýyllygyny belledi. Bu döwürde platformada aýdym-saz wideolaryndan we podkastlardan başlap, gysga wideolara çenli 20 milliarddan gowrak kontent ýerleşdirildi.
