Meta kompaniýasy 17-nji sentýabrda Kaliforniýada açylan Meta Connect konferensiýasynda öz akylly äýnekleriniň üç sany täze modelini hödürledi: Meta Ray-Ban Display, Meta Ray-Ban Gen 2 we Oakley Meta Vanguard.
Esasy üns Meta Ray-Ban Display äýnegine gönükdirildi. Onuň sag linzasyna kiçiräk ekran oturdyldy we ol habarnamalary, SMS habarlaryny, jaňlary we programma nyşanlaryny görkezýär. Äýnek emeli aňy goldaýar we myşsalaryň signalyny hasaba alýan Neural Band bilezigi arkaly dolandyrylýar. Şeýle-de, onda, öňki wersiýalarda bolşy ýaly, ses dolandyryşy göz öňünde tutuldy.
Meta Ray-Ban Display 30-njy sentýabrda ABŞ-da 799 dollar baha bilen satuwa çykar. Toplumda Neural Band bilezigi-de bar. 2026-njy ýylyň başynda modeli Kanadanyň, Fransiýanyň, Italiýanyň we Beýik Britaniýanyň bazarlaryna çykarmak meýilleşdirilýär.
Galan modeller – Meta Ray-Ban Gen 2 we Oakley Meta Vanguard kamera, mikrofon we nauşnik bilen üpjün edildi we ses arkaly emeli aň bilen işleşmäge mümkinçilik berýär. Meta Ray-Ban Display-den tapawutlylykda, olarda ekran ýok.
Meta Ray-Ban Gen 2 äýnegi 349 dollar bahadan eýýäm elýeterli. Oakley Meta Vanguard-yň satuwy 21-nji oktýabrda başlar, onuň bahasy 499 dollar bolar.
Meta-nyň Ray-Ban bilen bilelikde döredilen ilkinji akylly äýnegi 2021-nji ýylda çykaryldy.
