Xiaomi tötänden diýen ýaly maglumatlaryň syzmagyna ýol berdi: kompaniýanyň resmi akkaunty Weibo sosial ulgamynda gysga wagtlyk profil suratyny geljekki Xiaomi 17 Pro Max-yň renderi bilen çalyşdy. Suratyň tiz wagtdan aýrylandygyna garamazdan, ol muşdaklaryň we KHBS-iň arasynda ýaýrap ýetişdi.
Surat kamera blogunda ýerleşdirilen ikinji displeý barada ozal çaklanylan maglumatlary tassyklady. Xiaomi öň 11 Ultra modelinde goşmaça ekrany ulanypdy, ýöne soň bu pikirden ýüz öwürdi. Rendere görä, kompaniýa täze hatarda diňe bir funksiýany yzyna getirmek däl, eýsem ony ulaltmak kararyna gelipdir.
Munuň bilen bir wagtda Xiaomi 17 Pro-nyň ilkinji mahabat wideosy-da peýda boldy. Gysgaça wideo smartfony doly däl-de, diňe onuň dizaýnynyň esasy aýratynlygyny görkezdi. Goşmaça ekranda habarnamalar, howa maglumaty, aýdym-saz pleýeri görkeziler.
Ýatlap geçsek, kompaniýa geljekki tanyşdyrylyşynda Xiaomi 16 hatarynyň deregine Xiaomi 17-ni hödürlär. Şeýle etmek bilen kompaniýa öz täze smartfonlarynyň iPhone 17 bilen deňleşip biljekdigini görkezmek we amerikan brendi bilen bäsdeşligi güýçlendirmek isleýär.
Xiaomi 17, 17 Pro we 17 Pro Max modelleriniň tanyşdyrylyşynyň sentýabrda bolmagyna garaşylýar. Bu smartfonlar kompaniýanyň Snapdragon 8 Elite Gen 5 prosessoryna esaslanýan ilkinji flagmanlary bolar.
