14-nji sentýabrda Nagoýada (Aýti prefekturasy, Ýaponiýa) ikinji iň ýeňil agramda (55,2 kg çenli) absolýut dünýä çempiony ady ugrunda söweş geçirildi. Ringe titulyň häzirki eýesi ýaponiýaly Naoýa Inoue bilen özbegistanly boksçy Murojon Ahmadaliýew çykdy.
Eminler ýeňşi biragyzdan çempiona berdi: 117:100 we iki gezek 118:111.
“Nägehan” lakamly 32 ýaşly Inoue ýeňilmän galýar, onuň hasabynda indi 31 ýeňiş bar (27-si nokaut arkaly). Ol söweşiň gidişini ynamly dolandyryp, garşydaşyna mümkinçilik bermedi.
30 ýaşly özbegistanly boksçy ýaponiýalynyň karýerasynda iň howply garşydaşlaryň biri hasaplanýardy. Ol Inoueden öň professional karýerasynda 15 söweşden 14-üsinde ýeňdi, şolaryň 11-isi möhletinden ir tamamlandy.
Ýeňlendigine garamazdan, Ahmadaliýewiň Inoue bilen söweşi ahyryna çenli dowam etdirmegi başaran dördünji boksçy bolandygyny bellemek gerek.
Naoýa Inoue agram derejelerine garamazdan häzirki döwrüň iň gowy boksçylarynyň biri hasaplanýar. Ol P4P reýtinginde Terens Krouforddan we Aleksandr Usikden soň üçünji orny eýeleýär. Ol dört agram derejesinde guşaga eýeçilik edip, ikisinde – iň ýeňil we ikinji iň ýeňil diwizionlarda absolýut çempiondyr. Ol 55,2 kg çenli derejede dört titulyň ählisine 2023-nji ýyldan bäri eýeçilik edýär, şondan bäri ol bu guşaklary dört gezek üstünlikli gorady.
Ýeňişden soň Inoue indiki söweşiň dekabrda Saud Arabystanynda boljakdygyny aýtdy.
