Ýaponiýada 100 we ondan uly ýaşly adamlaryň sany 100 müňe golaýlady. Bu barada Ýaponiýanyň Saglygy goraýyş ministrliginiň maglumatlaryna salgylanyp, NHK teleradiokompaniýasy habar berdi.
Soňky bir ýylda ýüz ýaşly ýaponiýalylaryň sany 4644 adam artdy, bu hem soňky 55 ýylda iň ýokary artyş boldy. Häzirki wagtda 100 ýaşyny bellän 99 763 pensioner hasaba alyndy. Olardan 87 784-üsi – aýal, 11 979-ysy – erkek. Aýallar ýurduň garry raýatlarynyň 88%-ini düzýär.
Ýaponiýada iň garry adam 1911-nji ýylda doglan 114 ýaşly Sigeko Kagawa hasaplanýar. Bu aýal Nara prefekturasynyň Ýamatokoriýama şäherinde ýaşaýar. Iň garry erkek adam – Sidzuoka prefekturasynyň Iwata şäherinden 111 ýaşly Midzuno Kiesi Takadyr.
BMG-niň maglumatlaryna görä, dünýäde 100 we ondan uly ýaşly 630 müň töweregi adam bar. Bu Ýer ýüzünde her altynjy ýüz ýaşly adamyň diýen ýaly ýapondygyny aňladýar.
Alymlar XX asyrda ýetilen ömür dowamlylygynyň görlüp-eşidilmedik ösüşiniň soňky ýyllarda ep-esli haýallandygyny belleýär. Olaryň çaklamalaryna görä, 2000-nji ýyldan öň doglan hiç bir nesil ortaça 100 ýaşa ýetip bilmez.
