Mercedes-Benz Next Level Production atly täze önüm strategiýasyny yglan etdi. Bu strategiýanyň çäklerinde kompaniýa üç ýylyň içinde dünýä bazary üçin 40-dan gowrak täze we täzelenen modelleri çykarmagy meýilleşdirýär.
Ýewropadaky awtoulag öndürijisiniň önümçilik kuwwaty eýýäm önümçiligi artdyrmaklyga uýgunlaşdyryldy.
Täze strategiýanyň ilkinji modeli geljek ýylyň birinji çärýeginde ýygnalmaga başlanjak elektrikli GLC bolar. Ikinji täze önüm C kysymly sedanyň batareýa bilen işleýän görnüşi bolar, jikme-jiklikleri entek mälim edilmedi. Ony ýylyň ikinji çärýeginde çykarmak meýilleşdirilýär. Mundan başga-da, Hytaý bazary üçin ýörite işlenip düzülen uzaldylan teker bazaly GLC görnüş göz öňünde tutuldy.
Mercedes-Benz Ýewropa ýurtlaryndaky zawodlaryny ösdürmek üçin eýýäm 2 milliard ýewro maýa goýdy. Bremendäki we Keçkemetdäki zawodlar döwrebaplaşdyryldy we Zindelfingendäki zawod eýýäm synagdan geçýän täze Mercedes-AMG elektrik awtoulaglaryny ýygnamak üçin taýýarlanýar. Önümçilik proseslerini sanlylaşdyrmak, emeli aňyň ornaşdyrylmagy we täzelenip bilýän energiýa çeşmeleriniň ulanylmagy önümçilik çykdajylaryny 10% azaltmaly. Şeýle hem awtoulag ýygnamakda gumanoid robotlary ulanmak meýilleşdirilýär.
Kompaniýa GLC we C kysymly modellerden başga-da, ýakyn wagtda çykjak täze önümleriň takyk atlaryny mälim etmeýär. Ozal awgust aýynda bu strategiýanyň içinden otlanýan hereketlendirijisi bolan elektrikli ulaglary we awtoulaglary çykarmagy göz öňünde tutýandygy habar berlipdi, şonda 30 sany täze model barada aýdylypdy.
