Pop aýdymçysy Jastin Biber Swag II ady bilen täze albom çykardy. Bu aýdymçynyň sekizinji albomy boldy we adyndan görnüşi ýaly, onuň iýulda çykan albomynyň dowamydyr. Albom eýýäm esasy akym hyzmatlarynda diňlemek üçin elýeterli.
Geçenki albomda bolşy ýaly, aýdymçy Swag II-niň çykjakdygyny premýerasyndan birnäçe sagat öň aýtdy. Ol sosial ulgamlarda albomyň daşyny we dünýäniň dürli şäherlerinde goýlan mahabat tagtalarynyň suratlaryny paýlaşdy.
Reliz tehniki kynçylyklar bilen utgaşdy: ilkibaşda albom YouTube Music-de peýda boldy, beýleki platformalarda bolsa gijikdirildi. Biber sosial ulgamlarda muşdaklar bilen bilelikde garaşandygyny we sahypany yzygiderli täzeländigini ýazdy.
Alboma 23 aýdym girdi, olaryň arasynda Tems, Lil B, Bakar, Hurricane Chris we Eddi Benjamin bilen bilelikde döredilen eserler hem bar. 21 aýdymy öz içine alan iýuldaky albomy hasaba alsaň, aýdymlaryň umumy sany 44-e ýetdi. Diňleýjiler alboma oňyn baha berdi, aýratynam, I Do aýdymy tapawutlandy – ony “ajaýyp toý aýdymy” diýip atlandyrýarlar.
