ABŞ-da Indianapolisden Mark Sukerberg atly bankrot işleri boýunça hukukçy Meta kompaniýasyny kazyýete berdi. Munuň sebäbi Facebook sosial ulgamynda onuň şahsy we iş akkauntlarynyň birnäçe gezek petiklenmegi boldy, çünki ulgam olary korporasiýany esaslandyryjynyň ady bilen gabat gelýändigi üçin galp hökmünde kabul etdi diýip, New York Post ýazýar.
Neşiriň maglumatlaryna görä, soňky 15 ýylda aklawçynyň akkaunty bäş gezek, onuň firmasynyň sahypasy bolsa dört gezek petiklendi. Şol sebäpli ol Facebook-da mahabat üçin berlen, takmynan, 11 müň dollaryny ýitirdi. Ol bu hereketlere çydam etmän, kazyýete ýüz tutmak kararyna geldi.
Onuň aýtmagyna görä, sosial ulgam mahabat üçin töleg alyp, soňra onuň akkauntlaryny petikledi. “Olar men özümi belli şahsyýet hökmünde görkezip, öz hakyky adymy ulanman, jemgyýetçilik kadalaryny bozandyryn öýdýär. Maňa bu habar yzygiderli gelýär” – diýip, şikaýatçy aýdýar.
Öz şikaýat arzasynda Sukerberg ilkinji gezek öz sahypasynyň 2010-njy ýylda petiklenendigini görkezdi. Şondan bäri ol surat, sürüjilik şahadatnamasyny we kredit kartlaryny iberip, öz şahsyýetini ýygy-ýygydan subut etmeli boldy. Sukerberg muny kemsidiji diýip hasaplaýar.
Meta nägileligiň indi gelip gowuşandygyny we derňelýändigini habar berdi. Kompaniýanyň wekili şeýle belledi: “Biz dünýäde diňe bir Mark Sukerbergiň ýokdugyny bilýäris we bu meseläni çözeris”.
Soňra kompaniýa onuň akkauntlarynyň birini dikeldip, petiklenmäniň ýalňyşlykdygyny boýun aldy.
“Biz bu meselede jenap Sukerbergiň sabyrlylygyna ýokary baha berýäris we şeýle ýagdaýyň geljekde gaýtalanmazlygynyň üstünde işleýäris” – diýip, Meta belledi.
Şol bir wagtyň özünde, sosial ulgamdan daşary Sukerberg Meta-nyň baş direktorynyň ady bilen meňzeşlikden zeýrenmeýär. Tersine, munuň gowy taraplary hem bar, mysal üçin, bu restoranda gowy stol bronlamaga kömek edýär diýip, hukukçy degişýär.
