Dünýäniň birinji raketkasy Arina Sobolenko yzygider ikinji gezek ABŞ-nyň Açyk çempionatynda (US Open) ýeňiji boldy. Ýaryşyň finalynda belarusly tennisçi dünýäniň dokuzynjy raketkasy, amerikaly Amanda Anisimowany 6:3, 7:6 (7:3) hasabynda utdy.
27 ýaşly Sobolenko üçin bu US Open-iň yzygider üçünji finaly boldy: 2023-nji ýylda ol Kori Gauffdan utuldy, ýöne 2024-nji we 2025-nji ýyllarda ýeňiş gazandy. Şeýle-de, ol iki gezek Australian Open-de ýeňiji boldy (2023, 2024). Indi onuň hasabynda “Uly tuwulga” ýaryşlarynyň dört tituly we WTA-nyň howandarlygynda geçirilen ýekelikdäki ýaryşlarda 21 ýeňiş bar.
US Open-iň finalyna çykmak üçin belarusly tennisçi Rebeka Masarowany (Şweýsariýa), Polina Kudermetowany (Russiýa), Leýla Fernandesi (Kanada), Kristina Bukşany (Ispaniýa), Marketa Wondrouşowany (Çehiýa) we Jessika Pegulany (ABŞ) utdy.
Erkekler ýaryşynyň finaly Italiýadan dünýäniň birinji raketkasy Ýannik Sinner bilen Ispaniýadan dünýäniň ikinji raketkasy Karlos Alkarasyň arasynda geçer. 145-nji US Open-iň baýrak gaznasy rekord 90 mln dollara barabar.
