Google Android üçin sentýabrdaky howpsuzlyk täzelenmesini çykardy we onda 111 gowşaklyk düzedildi. Olardan 84-üsi operasion ulgam, 27-isi Qualcomm önümleri bilen baglanyşykly diýip, BleepingComputer habar berýär.
Aýrylan gowşaklyklaryň ikisi eýýäm hüjümçiler tarapyndan ulanyldy. Android ýadrosyndaky CVE-2025-38352 ýalňyşlygy POSIX CPU taýmerleriniň işindäki bökdençlik sebäpli hüjüm edýäne öz hukugyny artdyrmaga mümkinçilik berýärdi. Android Runtime-däki başga bir gowşaklyk – CVE-2025-48543 bolsa zyýanly programmalara goragy aldamaga we ulgam funksiýalaryna elýeterli bolmaga mümkinçilik berýärdi.
Mundan başga-da, täzelenme dört sany howply näsazlygy düzetdi. Olardan has howplusy (CVE-2025-48539) Wi-Fi ýa-da Bluetooth zolagynyň çäginde hüjüm edýäne ulanyjy gatnaşmazdan gurluşda kody işe girizmäge mümkinçilik berýärdi. Ýene üç gowşaklyk Qualcomm komponentlerine degişli bolup, ýadyň zaýalanmagyna we modem derejesinde koduň ýerine ýetirilmegine getirip biljek maglumatlary gaýtadan işlemek ýalňyşlyklary bilen baglanyşyklydy.
Täzelenme Android 13 we ondan täze ulgamlara eýe bolan gurluşlara ýaýraýar. Ony gurnamak üçin “Sazlamalar” → “Ulgam” → “Programma üpjünçiliginiň täzelenmesi” bölümini açmaly. Android 12-de we has köne wersiýalarda işleýän gurluşlaryň eýelerine täze modellere geçmek ýa-da aktual patçlar bilen programma üpjünçiligini ulanmak maslahat berilýär.
MediaTek aýratyn býulleten taýýarlady, Samsung kompaniýasy bolsa flagman gurluşlar üçin öz täzelenmesini çykardy.
