Samsung täze önümleriniň güýzki tanyşdyrylyşynda iki modelden – Tab S11 we S11 Ultra modellerinden ybarat bolan Galaxy Tab S11 planşet hataryny hödürledi.
Gurluşlaryň ikisi-de berk alýuminden korpusa we IP68 ülňüsi boýunça suwdan hem tozandan goraga eýe boldy.
Planşetleriň dizaýny inçe we ýeňil boldy: eger Tab S10 Ultra-nyň agramy 5,4 mm ýogynlykda 723 gram bolan bolsa, Tab S11 Ultra-nyň agramy 5,1 mm ýogynlykda 692 gram boldy. Şol bir wagtyň özünde, akkumulýator sygymy 400 mA/sag artdyryldy. Tab S11 0,1 mm inçe we 94 gram ýeňil boldy.
Täze modeller Dimensity 9300+ çibinde işleýär we öňki ýat göwrümlerini saklap galdy. Planşetler dört dinamik we ekranasty barmak yzynyň skaneri bilen üpjün edildi.
Galaxy Tab hatarynda ilkinji gezek “Sinhron terjime” we “Meniň günüm” (Now Brief) funksiýasy peýda boldy. Şeýle-de, Samsung planşetler üçin DeX režimini kämilleşdirdi: indi programmalar ululygyny we ýagdaýyny üýtgetmek mümkinçiligi bilen aýratyn penjirelerde açylýar.
Täzelenen S Pen ýelegi tutmak üçin rahat bolar ýaly altyburçly profile eýe boldy. Ekranyň islendik ýerinden bellik depderçesini açmak, surat çekmek we golýazma galdyrmak bolýar.
Planşetler çal we kümüşsöw görnüşlerde çykarylýar. Goşmaça Book Cover Keyboard, Book Cover we Frame Cover daşlyklary hödürlenýär.
Gurluşlar eýýäm ABŞ-da satuwa çykdy, beýleki ýurtlarda bolsa şu hepde peýda bolar. Bahalar Tab S11 üçin 799,99 dollardan, Tab S11 Ultra üçin 1199,99 dollardan başlaýar.
