Samsung Electronics kompaniýasy subflagmanlar kategoriýasyna degişli bolan Galaxy S25 FE smartfonyny resmi taýdan hödürledi. Kompaniýanyň aýtmagyna görä, täze smartfon emeli aň tehnologiýalaryny giň köpçülik üçin has elýeterli eder.
Galaxy S25 FE multimodal kömekçileri we şahsylaşdyrylan teklipleri birleşdirýän Galaxy AI ulgamy bilen üpjün edildi. Gurluş sesi, sensor dolandyryşyny we wizual seljermäni birleşdirýän One UI 8 interfeýsinde işleýär. Esasy funksiýalaryň arasynda şular bar:
- ·Gemini Live – kamera arkaly predmetleri tanaýar we ol baradaky soraglara jogap berýär;
- ·Now Bar wijeti – gönüden-göni gulplanan ekranda ähmiýetli maglumatlary görkezýär;
- ·Now Brief – şahsylaşdyrylan maglumat: günüň dowamynda peýdaly teklipleri düzýär;
- ·Circle to Search guraly – dowam edip duran işiň arasyny üzmezden gözleg.
Surat we wideo düşürmek üçin smartfon üç esasy kamera bilen üpjün edildi: 50 Mp, 8 Mp (telefoto) we 12 Mp (ultra giňburçly). Frontal kamera – 12 Mp. Gurnalan EA gurallary suratdaky obýektleri aýyrmak üçin Generative Edit-i, islendik klipden haýallaşdyrmany, sesi arassalamak üçin Audio Eraser-i we iň gowy kadrlary awtomatik saýlamak üçin Auto Trim-i öz içine alýar.
Model 120 Gs täzelenme ýygylygy bilen 6,7 dýuýmlyk Dynamic AMOLED 2X displeýine, 45 Wt çalt zarýad alyş goldawy bilen 4900 mA/sag sygymly akkumulýatora, Exynos 2400 prosessoryna we 10% ýokarlandyrylan sowadyş ulgamyna eýe boldy. Korpus berk alýuminden ýasaldy, gorag derejesi IP68 ülňüsine laýyk gelýär.
Galaxy S25 FE 7 ýylyň dowamynda täzelener we dört görnüşde hödürlendi: gök, mawy, gara we ak.
Smartfon birnäçe ýurtda satuwa çykar. Onuň bahasy 128 GB fleş-ýatly wersiýa üçin 749 ýewrodan başlaýar.
