Samsung öz taryhynda ilkinji üç eplenýän smartfony bolan Galaxy Z TriFold-y 2025-nji ýylyň oktýabrynda Unpacked çäresinde görkezmegi meýilleşdirýär. Gurluşyň satuwy bir aýdan soň başlamaly diýip, ET News habar berýär.
Kompaniýa bazaryň täze dizaýny kabul edişine baha bermek we bolup biljek kynçylyklaryň töwekgelçiligini azaltmak üçin häzirlikçe 50 000 birlik çykarmagy meýilleşdirýär. Şeýle-de, bu çözgüt iýulda çykan we gowy netijeleri görkezen Galaxy Z Fold 7 smartfonynyň satuwyny gowşatmazlyk islegi bilen baglanyşyklydyr.
Ilkibaşda smartfonyň diňe Günorta Koreýada we Hytaýda satylmagyna garaşylýar.
Syzma maglumatlara görä, Galaxy Z TriFold iki şarniriň kömegi bilen üç eplenýän 9,96 dýuýmlyk esasy displeý we 6,49 dýuýmlyk goşmaça ekran bilen üpjün edildi. Şeýle gurluş ekranynyň bir bölegi daşyna eplenýän Huawei Mate XT Ultimate bilen deňeşdirilende has berk hasaplanýar.
Maglumatlaryň biri ilkinji gezek geljekki modeliň epleniş we açylyş prosesini görkezdi. Kadrlarda displeýiň birinji paneliniň ikinjiniň üstünden eplenýändigi, soňra ikisiniň bilelikde üçünji paneliň üstünden ýapylýandygy görünýär. Şeýle çemeleşme diňe bir bäsdeşleriň dizaýnyndan däl, eýsem Galaxy Z TriFold-yň gurluşy baradaky öňki gürrüňlerden hem tapawutlanýar.
Gurluş Galaxy üçin Snapdragon 8 Elite prosessorynyň esasynda işleýär. Şeýle-de, simsiz zarýad beriş we beýleki enjamlara simsiz zarýad beriş goldawynyň, NFC tehnologiýasynyň bolmagyna garaşylýar.
