Niderlandly Erik ten Hag Lewerkuzeniň “Baýeriniň” baş tälimçisi wezipesinden aýryldy. Klubuň baş müdiri Fernando Karro şeýle çözgüdiň agyr bolsa-da, zerur ädimdigini belledi diýip, klubuň metbugat gullugy habar berýär.
Ten Hag toparyň başynda bary-ýogy üç resmi oýun geçirdi. Germaniýanyň Kubogynda “Baýer” dördünji diwiziondan “Zonnenhof Grossaspahy” utdy, çempionatda bolsa “Hoffenhaýmdan” utulyp (1:2) we “Werder” bilen deňme-deň (3:3) oýnap, iki tapgyrda bir utuk gazandy. Bu Bundesliganyň taryhynda möwsüm aralygynda topara ýolbaşçy bolan tälimçiniň ilkinji gezek ýaryşyň iki oýnundan soň işden çykarylmagy boldy diýip, Opta belleýär.
Möwsüm başlamazdan ozal “Baýer” Florian Wirts, Jeremi Frimpong we Granit Jaka ýaly esasy oýunçylaryndan aýryldy.
Ten Hag kluba Habi Alonso Madridiň “Realyna” gideninden soň tälimçi boldy.
“Baýer” niderlandly hünärmen üçin 2024-nji ýylyň güýzünde “Mançester Ýunaýtedden” gaýdanyndan soň birinji iş ýeri boldy. Möwsümiň birinji oýnundan öň tälimçi topary derrew düzüp, netije gazanar ýaly özüniň Garri Potter däldigini duýdurdy.
Ten Hag J.K.Roulingiň meşhur kitaplaryndan jadygöý oglany birinji gezek agzanok. Ol 2024-nji ýylyň sentýabrynda hem “Mançester Ýunaýted” “Liwerpuldan” utulandan soň (0:3), özüniň Garri Potter däldigini ýaňzydypdy. Şol ýylyň oktýabrynda ol wezipeden boşadyldy.
