Samsung nobatdaky Galaxy Event çäresiniň 2025-nji ýylyň 4-nji sentýabrynda geçiriljekdigini yglan etdi. Tanyşdyrylyş onlaýn geçer we kompaniýanyň resmi saýtynda hem YouTube kanalynda UTC boýunça 9:30-da (Aşgabat wagty bilen 14:30) ýaýlyma berler.
Bildirişe görä, çäräniň esasy wakasy “Galaxy S25 maşgalasynyň täze agzasynyň” görkezilmegi bolar. KHBS gürrüňiň Galaxy S25 FE smartfony baradadygyny ýazýar.
Şeýle-de, kompaniýa Galaxy Tab S11 premium planşet hataryny taýýarlaýar. Ol Tab S11 Ultra wersiýasyny hem öz içine alar.
Samsung EA funksiýalaryny ösdürmäge bil baglaýar. Gurluşlar giňeldilen multimodal mümkinçiliklere eýe bolar, Galaxy ekoulgamyna goşular we işlemek hem dynç almak üçin täze şertleri hödürlär.
Onlaýn tanyşdyryşdan başga-da, 5-nji sentýabrda Berlinde IFA 2025 sergisiniň çäklerinde janly görkezişler we goşmaça anonslar bilen metbugat maslahaty geçiriler.
Android Headlines neşiri Galaxy S25 FE smartfonynyň renderlerini hödürledi. Suratlarda smartfon gara, ak, gök we ýiti gök reňklerde görkezilýär.
Smartfon durulygy Full HD+ we ýygylygy 120 Gs bolan 6,7 dýuýmlyk AMOLED ekranyna, Exynos 2400 prosessoryna, 8 GB operatiw ýada we 512 GB çenli içki ýada, 4900 mA/sag sygymly akkumulýatora eýe bolar. Esasy kamera üç datçikden ybarat: optiki durnuklaşdyrma bilen 50 Mp, 12 Mp we üç esse zum bilen 8 Mp. Smartfon ekranasty barmak skaneri we IP68 goragy bilen üpjün ediler.