Ispaniýanyň Bunýol şäherinde 80-nji La Tomatina festiwaly geçirildi, onuň çäklerinde bolsa däbe öwrülen “pomidor söweşi” boldy.
Baýramçylyga dünýäniň dürli ýerinden syýahatçylar geldi, olar giriş petegi üçin 15 ýewro töledi. Ýerli ýaşaýjylar bilen bilelikde olar birek-birege, takmynan, 120 tonna pomidor zyňdy diýip, El País habar berýär.
Festiwal 27-nji awgustda günortan başlady. Şäheriň merkezine pomidorly alty ýük ulagy geldi we meýletinçiler olary gatnaşyjylaryň arasynda zyňyp başlady. Agşam köçeleri we öýleri suw şlanglarynyň we ýangyn söndüriji ulaglaryň kömegi bilen arassalaýarlar.
La Tomatina Bunýolda 1945-nji ýyldan bäri awgustyň soňky çarşenbesinde geçirilýär. Ilkibaşda baýramçylyk çagalaryň birek-birege pomidor zyňmagy bilen başlapdy.
1950-nji ýyllarda festiwal Fransisko Franko tarapyndan gadagan edildi, sebäbi baýramçylygyň dini manysy ýokdy we peýda getirmeýän ýa-da ispan gymmatlyklaryna laýyk gelmeýän zat hökmünde görüldi. Bunýolyň ýaşaýjylary bu çözgüde garşy çykdy we hatda “pomidor jaýlamasyny” geçirdi. Gadaganlyk 70-nji ýyllaryň ortalarynda ýatyryldy. 1980-nji ýyllardan bäri La Tomatina her ýyl müňlerçe syýahatçyny özüne çekýän milli baýramçylyk hasaplanýar.
