“Mançester Sitiniň” hüjümçisi Erling Holand Norwegiýanyň milli ýygyndysynda geýjek köýnekçesiniň arkasyndaky familiýasyny üýtgeder. Bu barada milli ýygyndynyň sosial ulgamlardaky resmi sahypasynda habar berilýär.
Postda 9-luk belgili we arkasynda “Braut Haaland” – Brýout Holand ýazylan köýnekçe bilen wideo ýerleşdirildi. 25 ýaşly futbolçy ýazga ejesiniň, öňki ýeňil atletikaçy we ýedi görnüşli ýaryş boýunça Norwegiýanyň çempiony Grýu Marita Brýoutyň familiýasyny goşdy. Futbolçy ene-atasynyň ikisiniň hem familiýasy bilen çykyş etmek kararyna geldi.
Ilkinji gezek Holand täze köýnekçesinde sentýabrda Finlýandiýa we Moldowa bilen DÇ-2026-nyň saýlama oýunlarynda oýnar. Şol bir wagtyň özünde, “Mançester Sitiniň” köýnekçesinde Erling familiýasyny üýtgetmegi meýilleşdirmeýär.
