Beýik Britaniýada Uels şa gyzy Diana tarapyndan goýlan wagt kapsulasy açyldy. Bu barada The Guardian ýazýar.
Agaç guty 1991-nji ýylda Londonyň merkezindäki Greýt-Ormond-Stritde Variety Club hassahanasynyň binasynyň düýbi tutulanda gömüldi. Diana 1989-njy ýylda bu lukmançylyk edarasynyň prezidenti boldy we 1997-nji ýylda aradan çykmazyndan ozal oňa birnäçe gezek baryp gördi.
Diana wagt kapsulasyny “Blue Peter” çagalar programmasynyň bäsleşiginde ýeňiji bolan iki çaga bilen bilelikde gömdi. Olar 1990-njy ýyllardaky durmuşy alamatlandyrýan 10 predmeti saýlady.
Şol wagt 11 ýaşynda bolan Peýntondan Dewid Uotson bu kapsula Kaýli Minougyň “Rhythm of Love” albomy bilen ykjam diski, gaýtadan işlenen kagyz ýapragyny we pasport goýdy.
Norijden dokuz ýaşly Silwiýa Foulks britan teňňelerini, bäş agaç tohumy bolan konteýneri we garjagazyň gologrammasyny goşdy.
Şeýle-de, kapsula jübi telewizory, Gün batareýasynda işleýän kalkulýator, daşynda Mihail Gorbaçýowyň suraty bolan Times gazetiniň nusgasy we Diananyň suraty goýuldy.
Ilkibaşda geljege ýüzlenme “ýüzlerçe ýyl” durar diýlip çaklanypdy, ýöne ony 35 ýyldan az wagtdan soň gazyp aldylar. Bu täze çagalar onkologiýa merkeziniň gurluşygyna ýer boşatmak üçin edildi.
