Ozal Germaniýada taksi hökmünde ulanylan Mercedes-Benz E-Class 2,2 mln kilometrden gowrak ýol geçip, işe ukyply ýagdaýda galdy. Häzir awtomobil Finlýandiýada diýip, “Ilta-Sanomat” neşiri ýazýar.
Ulagyň eýesi – ulanylan “Mersedesleri” satmak bilen meşgullanýan 36 ýaşly işewür Wille Rýaýsýanen. Ol 2002-nji ýylyň E-Class ulagynyň 2018-nji ýylda Finlýandiýa import edilendigini aýtdy. 2016-njy ýyla çenli ulag Germaniýanyň taksi parkynda işledi we şol ýerde hem rekord menzili gazandy.
Ýöne awtomobili hasaba almak synanyşygynda Finlýandiýanyň salgyt edarasy odometriň görkezijilerine şübhelendi. Döwlet işgärleri ulagyň häzire çenli gezen menziliniň 180 müň kilometrden geçip bilmejekdigini aýdyp, degişli netije çykardy.
Awtomobil şirmaýy reňke boýalan we ýagdaýy gowy. Eýesiniň aýtmagyna görä, sedan köp sanly bejeriş işlerinden geçdi, şol sanda transmissiýa, kondisioner we forsunka çalşyldy, ýöne hereketlendirijä el degrilmedi.
Salgyt inspektory 2,2 mln kilometri tassyklaýan tehniki hyzmat boýunça resminamalaryň hödürlenendigine garamazdan, ulag eýesine “odometri yzyna towlandygy üçin” 1000 ýewro jerime saldy. Netijede hasaba alyşda 186 müň kilometr menzil görkezildi.
Ulagyň odometri, hakykatdan hem, iki gezek towlandy, sebäbi ol 999 999 km bellikde doňup galypdy.
Bu Mercedes-den başga-da, Rýaýsýaneniň taksi parkyndan 1,2 mln km menzili geçen ýene bir awtomobili bar. Ony häzir aýaly gulluk ulagy hökmünde ulanýar.
