Mercedes-Benz konserni Germaniýada köne awtomobilleri sökmek boýunça synag taslamasynyň işe girizilendigini habar berdi. Resmi maglumatlara görä, bu başlangyjyň maksady girdeji däl-de, daşky gurşawa ýetýän zyýanly täsiri azaltmakdyr: çig malyň bir bölegi gaýtadan işlenenden soň önümçilikde ulanylar.
Taslama urban mining – “gazylyp alynýan peýdaly magdanlary şäherde gazyp almak” resmi däl adyny aldy. Konsern TSR hyzmatdaş kompaniýasy bilen bilelikde ulaglary sökmegi, tebigat üçin zyýanly maddalary aýyrmagy we materiallary görnüş taýdan – metallar, plastik, aýna we ş.m. boýunça tertipleşdirmegi meýilleşdirýär.
Alnan çig maly ýörite tehnologiýa boýunça gaýtadan işlemek we täze awtomobilleriň önümçiliginde ulanmak göz öňünde tutulýar. Şeýlelikde, geljekki Mercedes-Benz ulaglarynyň bir bölegi köne ulaglaryň şaýlaryndan we materiallaryndan dörediler.
Konserniň meýilnamasyna görä, geljek on ýylyň içinde önümçilikde gaýtadan ulanylan çig malyň paýy 40%-e ýetmeli. “Şäherde gazyp almak” diňe bir ekologiýa düşýän agramy azaltman, eýsem arzan materiallaryň goşmaça çeşmesi bolup hyzmat etmeli.
