ABŞ mikroprosessorlary we beýleki kompýuter elementlerini öndürýän Intel korporasiýasynyň paýnamalarynyň 10%-ini satyn aldy. Bu barada Prezident Donald Tramp Truth Social sosial ulgamyndaky sahypasynda habar berdi.
“Amerikanyň Birleşen Ştatlary indi öňünde ajaýyp geljegi bolan beýik amerikan kompaniýasynyň, Intel kompaniýasynyň 10%-ine doly eýeçilik edýär we gözegçilikde saklaýar” – diýip, Tramp ýazdy.
Ak tamyň ýolbaşçysy kompaniýanyň baş direktory Lip-Bu Tan bilen gepleşikleri geçirendigini aýtdy. Ol ABŞ-nyň 11 mlrd dollarlyk paýnamalary satyn alandygyny, ýöne bu paýnamalar üçin “hiç zat tölemändigini” belledi.
Lip-Bu Tan Intel kompaniýasyna mart aýynda ýolbaşçy boldy. Awgust aýynyň başynda Tramp hytaý kompaniýalary bilen aragatnaşykda şübhelenmegi sebäpli ony wezipeden gitmäge çagyrdy. Prezident kompaniýanyň ýolbaşçysynyň hytaý firmalaryna maýa goýmagyndan ugur aldy. Ozal şeýle aýyplamalary senator-respublikaçy Tom Kotton öňe sürüp, şeýle gatnaşyklaryň ABŞ-nyň milli howpsuzlygyna zyýan ýetirýändigini aýdypdy.
Wezipeden gitmek tabşyrylandan soň, Lip-Bu Tan bu düşünişmezligi aradan aýyrmak üçin Ak tamyň wekilleri bilen gepleşik geçirýändigini aýtdy.
