Xiaomi kompaniýasy öz taryhynda ilkinji tigirçekli telewizoryny – Xiaomi MAX 27-ni hödürledi. Ol oturdylan akkumulýator bilen işleýär. Ony öýüň içinde bir ýerden başga bir ýere göçürmek we islendik otagda filmdir seriallara tomaşa etmek bolýar.
Model Hytaýda 21-nji awgustdan Xiaomi Youpin platformasynda elýeterli bolar.
MAX 27 durulygy FullHD we täzelenme ýygylygy 60 Gs bolan 27 dýuýmlyk sensor IPS ekranyna eýe boldy. Ony beýikligi (20 sm çenli), egilme burçy (20-25 gradus) boýunça sazlap, hatda keseligine ýa-da dikligine hem öwrüp bolýar. Telewizor tigirçekli alýumin aýakda saklanýar.
Telewizoryň aşaky böleginde 9700 mA/sag sygymly akkumulýator ýerleşdirildi we kompaniýanyň maglumatlaryna görä, ol 13 gün işlemek üçin ýeterlikdir. Zarýad USB-C arkaly berilýär, şeýle-de USB-A we HDMI 1.4 portlary göz öňünde tutuldy.
Gurluş HyperOS-yň esasynda işleýär. Ekrandan onlaýn kinoteatrlary açmak, Xiaomi Home programmasy arkaly akylly öýi dolandyrmak, howany barlamak, bellik etmek, Android programmalaryny işletmek we aýdym-sazy dolandyrmak bolýar. MAX 27 oýunlar, karaoke üçin hem laýyk gelýär, ses dolandyryşyny, EA funksiýalaryny hem goldaýar.
Model 8 ýadroly prosessor, 16 GB operatiw we 128 GB hemişelik ýat bilen üpjün edildi.
Telewizoryň bahasy 3999 ýuana (takmynan, 555 dollar) barabar.
