Toyota dürli görnüşli awtomobiller üçin laýyk gelýän täze nesil benzin hereketlendirijilerini taýýarlaýar. Hereketlendirijiler hem adaty içinden ýandyrylýan hereketlendirijileri bolan awtomobillerde, gibridlerde (HEV), birikdirilýän gibridlerde (PHEV), ýol ätiýaçlygy artdyrylan elektromobillerde (EREV), şeýle-de, bioýangyçda, e-fuels-de we wodorodda işleýän ulaglarda ulanmak üçin döredilýär.
Kompaniýanyň meýilnamalary barada Toyota Europe-niň strategiýa we marketing boýunça wise-prezidenti Andrea Karluççi habar berdi.
Onuň aýtmagyna görä, täze hatar 1,5 litrlik dört silindrli atmosfera we turbo hereketlendirijilerini, şeýle-de 2,0 litrlik turbo enjamyny öz içine alar. Bu hereketlendirijiler ykjam, tygşytly we has kuwwatly bolar.
2024-nji ýylyň maýynda belli bolan Subaru we Mazda bilen hyzmatdaşlyk umumy tehnologiýalaryň we maksatlaryň esasynda her bir markanyň hereketlendirijileriň hususy wersiýalaryny döretmegini göz öňünde tutýar.
Kompaniýa EREV segmentine aýratyn üns berýär. Munda benzin hereketlendirijisi diňe batareýa zarýad bermek üçin generator hökmünde işleýär. GAC bilen hyzmatdaşlykda Toyota şeýle modelleri hytaý bazary, şol sanda Highlander we Sienna üçin çykarmagy meýilleşdirýär.
Köp öndürijiler içinden ýandyrylýan hereketlendiriji platformalaryny elektromobillere görä sazlamak ýoluny saýlady. Biz muny tersine etmegi – elektromobil üçin platforma taýýarlap, ony artykmaçlygyny ýitirmezden gibridler ýa-da PHEV üçin ýaramly etmegi teklip edýäris diýip, Andrea Karluççi belledi.
Kompaniýanyň prezidenti Akio Toýoda elektromobilleriň dünýä bazarynyň 30%-inden köp eýelemejekdigini, tehnologiýalaryň köpdürlüliginiň bolsa içinden ýandyrylýan hereketlendirijileriň ýene uzak wagtlap ýörgünli bolmagyna mümkinçilik berjekdigini aýdýar.
