“Mançester Ýunaýted” 22 ýaşly sloweniýaly hüjümçi Benýamin Şeşko bilen şertnama baglaşylandygyny resmi taýdan yglan etdi. Klub bilen oýunçynyň şertnamasy 2030-njy ýylyň iýunyna çenli hereket eder.
Resmi däl maglumatlara görä, “MÝ” transfer üçin “RB Leýpsige” 76,5 mln ýewro töledi, şeýle-de 8,5 mln ýewro möçberde bonus göz öňünde tutuldy.
Şeşko nemes klubunda 2023-nji ýyldan bäri çykyş etdi. Ol 87 oýna gatnaşyp, 39 gol geçirdi we 8 assist etdi. Transfermarkt onuň bazar bahasyny 70 mln ýewro diýip hasaplaýar.
Beýleki uly transferleriň arasynda “Bornmutyň” 22 ýaşly ukrainaly goragçysy Ilýa Zabarnynyň “Pari Sen-Žermene” geçmegi bar. Insaýder Fabrisio Romanonyň maglumatlaryna görä, klublar ylalaşyk gazandy. Şertnamanyň bahasy 67 mln ýewro diýlip hasaplanýar. Futbolçynyň fransuz kluby bilen bäş ýyllyk şertnama baglaşmagyna garaşylýar.
Zabarnyý lukmançylyk barlagyndan geçer we 13-nji awgusta meýilleşdirilen UEFA-nyň Superkubogyndan öň (“PSŽ” bilen “Tottenhem” oýnar) topara goşular.
Şeýle-de, Romano 34 ýaşly merkezi goragçy Inýigo Martinesiň “Barselonadan” saud “Al-Nasryna” gidýändigi baradaky maglumaty tassyklady. Ol katalon kluby bilen şertnamany ýatyryp, erkin agent hökmünde Kriştianu Ronaldunyň toparyna goşular. Oýunçy “1+1” shemasy boýunça şertnama baglaşar.
Martines “Barselonada” karýerasynyň soňky iki ýylyny geçirdi. Ondan öň “Real Sosýedadyň” we Bilbao “Atletigiň” oýunçysy bolupdy.
