Rockstar Games GTA Online-da oýunçylaryň ýaşyny barlamak ulgamyny işe girizmäge taýýarlanýar. Internetde täze funksiýanyň interfeýsiniň suraty peýda boldy diýip, DTF portaly ýazýar.
Ekran suratlary awgust aýynyň başynda oýun faýllarynda ýüze çykarylan maglumatlary tassyklaýar. Çak edilişi ýaly, ýaş QR koduny skanirlemek arkaly barlanar, ýöne hut haýsy serwisiň ulanyljakdygy entek belli däl.
Deslapky maglumatlara görä, täze ulgamyň hereket edip başlajak ilkinji ýeri Beýik Britaniýa bolup biler. Bu ýaňy-ýakynda internetde çagalary goramak barada kanunyň güýje girmegi bilen baglanyşyklydyr. Köp onlaýn hyzmatlar, mysal üçin Spotify eýýäm britan häkimiýetleriniň täze talaplaryna görä hereket edip başlady. Şeýle çäreler degişli kanun hereket edýän beýleki ýurtlarda-da girizilip bilner.
GTA Online 2013-nji ýylyň 1-nji oktýabrynda çykdy we häzirki oýun platformalarynyň köpüsinde elýeterlidir. Sebitleriň köpüsinde oýunda 18+ reýtingi bar, şonuň üçin täze ulgamyň işe girizilmegi kämillik ýaşyna ýetmedik ulanyjylar üçin elýeterliligiň çäklendirilmegine getirip biler.
