Blue Origin kompaniýasy 3-nji awgustda NS-34 missiýasynyň çäklerinde suborbital uçuşy üstünlikli amala aşyrdy. New Shepard raketasynda uçuşa kriptomilliarder Jastin San we ýene bäş gatnaşyjy iberildi. Uçuş günbatar Tehasdaky kosmodromdan boldy.
Bu New Shepard enjamynyň 34-nji uçuşydyr.
Tron blokçeýn-platformasynyň 34 ýaşly esaslandyryjysy Jastin San 2021-nji ýylyň iýunynda New Shepard-yň ilkinji adamly uçuşyna 28 mln dollara petek satyn aldy. Ýöne ol meýilnamalaryň ters gelendigi sebäpli 2021-nji ýylyň 20-nji iýulyndaky taryhy uçuşa gatnaşyp bilmedi. Şol wagt uçuşa Jeff Bezos, onuň dogany Mark, awiasiýa pioneri Uolli Fank we niderlandly talyp Oliwer Daemen iberildi.
NS-34 missiýasynyň bortunda San bilen bilelikde amerikaly maýadar Arwinder (Arwi) Singh Bahal, türk telekeçisi we fotosuratçysy Gökhan Erdem, puertorikoly žurnalist we meteorolog Deborra Martorel, Nepalda çagalar öýüni dolandyryjy angliýaly Laýonel Pitçford we amerikaly telekeçi Jeýms (JeýDi) Rassel bardy. Rasselden başga ähli gatnaşyjylar üçin bu ilkinji kosmos uçuşy boldy.
“Biziň üçin şu günki uçuşymyzda birnäçe ýurduň wekilini görmek mertebe. Kosmosdan näzik planetamyzyň görnüşi ony görýän hemmäni birleşdirýär we meniň üçin astronawtlarymyzyň bu tejribäni Ýeriň bähbidine ulanmagy hemişe gyzykly” – diýip, Blue Origin-den New Shepard-yň uly wise-prezidenti Fil Joýs missiýa teswir berdi.
