Ýaponiýa hemralara we Halkara kosmos stansiýasyna howp salýan kosmos zibillerini aýyrmak üçin halkara düzgünleri işläp taýýarlamagy meýilleşdirýär. Bu barada ýurduň resmi şahslaryna salgylanyp, Kyodo agentligi habar berýär.
2026-njy ýylyň martyna çenli ýurduň Ministrler Kabineti hünärmenler bilen bilelikde raketalaryň we hemralaryň döwük bölekleri ýaly orbitadaky obýektleri aýyrmagyň hukuk we amaly taraplaryny kesgitlär. Wezipeleriň arasynda döwletlerden we hususy eýelerden zibil barada maglumat almagyň tertibi bar.
Bu başlangyç 2026-njy ýylda BMG-niň kosmosy parahatçylykly peýdalanmak baradaky komitetinde ara alyp maslahatlaşmak üçin taýýarlyk bolar.
Orbitadaky 7-8 km/sek tizlik bilen hereket edýän zibil kiçi bolsa-da hemralara zyýan ýetirmäge ukyplydyr. Ýewropanyň kosmos agentliginiň maglumatlaryna görä, orbitada 3 müň töweregi işlemeýän hemra we 2 müň raketa bölegi bar. Amerikan maglumatlary 10 sm-den uly 30 müňden gowrak obýektiň we 1 mm-den uly 100 milliondan gowrak bölegiň bardygyny görkezýär.
Ýapon kompaniýasy Astroscale Japan Inc. geçen ýyl hemranyň kömegi bilen zibili surata düşürdi we ony 2027-nji maliýe ýylyna çenli aýyrmagy meýilleşdirýär. Ýaponiýanyň aerokosmos gözleg agentligi (JAXA) çaknyşma howpy bolan ýagdaýynda öz hemralarynyň ugruny wagtlaýyn üýtgedýär.
