Russiýaly Islam Mahaçew 15-nji noýabrda Nýu-Ýorkdaky meşhur “Medison-skwer-garden” arenasynda awstraliýaly Jek Della Maddalena bilen titul söweşini geçirer. Bu barada ABŞ-da geçirilen metbugat maslahatynda ýeňil agram derejesinde UFC-niň öňki çempiony Habib Nurmagomedow habar berdi.
“Biziň ylalaşygymyz bar. Islam “Medison-skwer-gardende” Jek Della Maddalena bilen söweşer. Olar razy boldular” – diýip, Habib aýtdy.
Ýatlap geçsek, Mahaçew ýeňil agramda tituly boşadyp, has agyr agram derejesine geçdi. Şondan soň erkin guşagy Çarlz Oliweýra bilen söweşde Iliýa Topuriýa aldy.
Garyşyk başa-baş söweşde 33 ýaşly Mahaçewiň professional rekordy 27 ýeňişden we 1 ýeňlişden ybarat. Ol özüniň soňky söweşini 18-nji ýanwarda geçirdi. Şol wagt Islam Los-Anjelesde (Kaliforniýa ştaty, ABŞ) geçirilen UFC 311 ýaryşynyň esasy söweşinde birinji raundda demikdiriji usul bilen braziliýaly Renato Moýkanony ýeňdi. Mahaçew üçin bu ýeňiş ýeňil agramda yzygider 14-nji boldy.
Maddalena yzygider 18 söweş – 2016-njy ýyldan bäri ýeňilmän gelýär. Ol karýerasynyň başynda diňe iki gezek ýeňlişe sezewar boldy, şondan soň 0-2 hasabyny 18-2 etdi. Soňky gezek 28 ýaşly söweşiji şu ýylyň maý aýynda UFC 315 ýaryşynda Belal Muhammada garşy söweşdi. Bu söweşde Jek emin agzalarynyň biragyzdan karar bermeginde ýeňiş gazandy we ýarym orta agram derejesinde UFC-niň çempion guşagyny eýeledi.
