Ford kompaniýasy elektron tormoz güýçlendirijisiniň mümkin bolan näsazlygy sebäpli ABŞ-da 312 müň awtomobili yzyna gaýtarýar. Bu barada ABŞ-nyň Milli ýol hereketiniň howpsuzlyk edarasynyň (NHTSA) saýtynda habar berilýär.
Bu näsazlyk ulaga tormoz berlende, bökdençlik döredip, tormoz aralygyny uzaldyp biler. Bu bolsa heläkçilik töwekgelçiligini ýokarlandyrýar. Mesele adaty sürüşde-de, sürüjä kömek ulgamy ulanylanda-da ýüze çykyp biler.
Kampaniýanyň çäklerinde Lincoln Navigator, Ford F-150, Expedition, Bronco we Ranger modelleri hyzmat merkezlerine iberiler. Awtoulag eýeleri üçin elektron tormoz güýçlendirijisini (EBB) dolandyrýan programma üpjünçiligi mugt täzelener.
Mundan öň iýulda Ford ýangyç nasosynyň näsazlygy sebäpli 850 318 awtomobili yzyna ýygnapdy. Şol wagt sanawa Ford Mustang, F-150 we Lincoln Aviator düşdi. Şeýle-de, ýangyna getirip biljek ýangyjyň syzmak ähtimallygy sebäpli hyzmat merkezlerine 694 271 sany 2021—2024-nji ýyllaryň Bronco Sport we 2020-2022-nji ýyllaryň Escape awtomobili iberildi.
