“Maklaren” toparynyň ýaryşa gatnaşyjylary yzygider dördünji gezek “Formula-1-iň” münberinde ilkinji iki orny eýeledi. Ýekşenbe güni geçen Wengriýanyň Gran-prisinde birinji bolup pellehana Lando Norris, ikinji bolup onuň topardaşy Oskar Piastri geldi.
Bu eýýäm britan toparynyň häzirki möwsümde ýedinji we taryhynda 56-njy gezek ilkinji iki orny eýelemegi boldy. Ondan köp görkeziji diňe “Ferraride” (87) we “Mersedesde” (60) bar. Çempionatyň yzygider ilkinji iki orny eýelemek boýunça rekordy – bäş dubl – “Ferrari” (1952, 2002) we “Mersedes” (2014, 2015-2016, 2019) toparlaryna degişli.
“Ferrariniň” sürüjisi Şarl Lekler ýaryşa pouldan başlady, ýöne pellehana dördünji bolup geldi. Bu poul onuň üçin häzirki möwsümde birinji we karýerasynda 27-nji boldy. Ol 22-nji gezek pouly ýeňşe öwrüp bilmedi. Soňky gezek birinji orundan Monakonyň Gran-prisi-2024-de ýeňiş gazandy.
Wengriýadaky ýeňiş Norrise çempionatyň öňdebaryjysyndan we topardaşyndan aratapawudyny azaltmaga mümkinçilik berdi. Indi onuň hasabynda 275 utuk, Piastride 284 utuk bar. “Red Bulldan” Maks Werstappen pellehana dokuzynjy bolup geldi we 187 utuk bilen umumy sanawda üçünji orunda galýar.
