Aziýa ösüş banky (AÖB) Liýa Gutýerresi Merkezi we Günbatar Aziýa boýunça Departamentiň baş direktory wezipesine belledi. Bu wezipede ozal Ýewgeniý Žukow işleýärdi.
Liýa Gutýerres häzirki wagtda AÖB-niň Merkezi we Günbatar Aziýa boýunça strategiýalarynyň durmuşa geçirilmegine ýolbaşçylyk edýär. Bu sebit 11 ýurdy - Türkmenistany, Owganystany, Ermenistany, Azerbaýjany, Gruziýany, Gazagystany, Gyrgyzystany, Pakistany, Täjigistany, Türkiýäni we Özbegistany öz içine alýar.
Liýa Gutýerres Filippinleriň raýaty bolup, ABŞ-nyň Pensilwaniýa uniwersitetinde ykdysadyýet boýunça magistr we doktor derejesini aldy. Onuň 40 ýyldan gowrak hünär tejribesi bolup, şonuň 25 ýylyny Aziýa ösüş bankynda geçirdi. Täze wezipesine bellenmezinden öň, ol maliýe, adam maýasyny ösdürmek we döwlet dolandyryş ugurlary boýunça iş alyp barýan 3-nji sektorlar departamentine ýolbaşçylyk etdi. Mundan öň, Gutýerres AÖB-niň Ýuwaş ummanu sebitindäki işlerine-de ýolbaşçylyk etdi.
Türkmenistan bilen AÖB-niň hyzmatdaşlygy ulag, energetika, hususy pudagy goldamak we maýa goýum hyzmatdaşlygy ugurlaryny öz içine alýar. 2025-nji ýylda Türkmenistan AÖB-niň agzasy bolmagynyň 25 ýyllygyny belledi.
