Twitter-i esaslandyryjylaryň biri Jek Dorsi tarapyndan döredilen Bitchat gysga beta-synagdan soň resmi taýdan App Store-da çykdy. Bu programma ulanyjylaryň arasyndaky aragatnaşyk üçin Bluetooth ulanyp, interneti, telefon belgisini, serwerleri ýa-da elektron poçtany talap etmeýär.
Bitchat gizlinlige gönükdirilen bolup, merkezleşdirilen däldir. Ol serwerleri, akkauntlary ulanmaýar we ulanyjy maglumatlaryny ýygnamaýar. Programma işe girizilende ulanyja tötänleýin nik berilýär, ony üýtgedip hem bolýar. Çepe geçirmek ýa-da “Ulanyjylar” nyşanyna basmak Bluetooth-yň hereket edýän töwereginde çat üçin elýeterli bolan adamlary görkezýär. Olaryň birine basyp, gizlin çata başlap bolýar.
Habarlar hatda gönüden-göni arabaglanyşyk bolmasa-da, golaýdaky beýleki Bitchat ulanyjylaryň gurluşlarynyň üsti bilen gerekli ulanyja ýetirilýär. Ähli habarlar şifrler arkaly goralan. “Howsala režimi” funksiýasy interfeýsdäki logotipe üç gezek basmak arkaly programmanyň ähli maglumatlaryny bozmaga mümkinçilik berýär.
Dorsi iOS wersiýada heniz Android gurluşlar bilen arabaglanyşyga päsgel berýän ýalňyşlygyň bardygyny tassyklady, ýöne düzediş eýýäm App Store-a iberildi. Düzediş tiz wagtdan täzelenmede peýda bolar. Ýene bir kemçilik, Bitchat arkaly faýllary, suratlary we beýleki resminamalary iberip bolmaýar. Diňe tekst habarlary elýeterlidir.
Taslama doly open-source çykaryldy, onuň kody GitHub-da goýuldy. Bu dünýäniň ähli ýerinden işläp düzüjileriň we höwesjeňleriň programmany öwrenip, ony kämilleşdirip ýa-da öz wersiýalaryny döredip biljekdigini aňladýar.
Android gurluşlar üçin programmany GitHub bilen ýükläp bolýar. Google Play-de meňzeş atly birnäçe programmalar ýerleşdirildi, ýöne olar diňe Dorsiniň programmasy bolan bolup, ýüzlerçe müň ýükleme ýygnaýar. Işläp düzüjiler ýalan programmalardan seresap bolmagy maslahat berdi.
Ulanyjylar programmanyň ykjam göwrümini (2 MB) we internetiň tutmaýan ýerlerinde, mysal üçin, metroda, uçarlarda ýa-da internet birikmesiniň gowşak bolan ýerlerinde ulanmak üçin amatlydygyny belleýär.
