Telegram-da ulanyjylaryň ýaşyny barlamak üçin resmi bot peýda boldy. Bu barada “Kod Durowa” habar berýär.
Täze gural mini-programma esaslanýar we ýüzi skanirlemek funksiýasyny ulanýar.
Boty aýratyn ýa-da sazlamalar menýusy arkaly işe girizmek bolýar. Häzirki tapgyrda ol ýaşy tassyklamagy kanuny derejede talap edýän ýurtlarda işleýär. Telegram öz tehnologiýalaryny ulanýar we beýleki kompaniýalaryň hyzmatlaryna ýüz tutmaýar.
Işläp düzüjiler ýüzi skanirlemegiň gurluşyň özünde amala aşyrylýandygyny nygtaýar: maglumatlar ulanyjynyň gurluşyndan daşyna çykmaýar, saklanyp galmaýar, serwerlere iberilmeýär we üçünji taraplar üçin elýeterli däldir.
“Gurluşda ýüzi çalt skanirlemegiň kömegi bilen ýaşy tassyklamak üçin bu boty ulanyň. Hiç bir surat ýa-da maglumat siziň gurluşyňyzdan daşyna çykmaýar we biziň serwerlerimize düşmeýär. Sebit kanunyna laýyklykda, biz diňe siziň 18 ýaşdan kiçidigiňizi ýa-da uludygyňyzy barlaýarys – başga hiç zat saklanmaýar we iberilmeýär” – diýlip, Telegram-yň resmi habarynda aýdylýar.
Eger ulanyjy ýaş çäklendirmesi bolan kontente elýeterli bolmak islese, programma onuň 18 ýaşandygyny tassyklamak üçin barlagdan geçmegi teklip eder. Funksiýanyň işlemegi üçin diňe kamera rugsat bermek ýeterlik, Face ID goldawy hökman däl. Ýaşyň tassyklanmagy bir gezek geçirilýär. Bellenilişi ýaly, ulgam galp suratlary tapawutlandyrmaga ukyply, şonuň üçin feýk suratlary ulanmak mümkin däl.
Häzirki wagtda bot Beýik Britaniýada elýeterli. Barlagdan geçilmese, messenjer tarapyndan ulular üçin niýetlenen diýlip kesgitlenen materiallara elýeterlilik çäklendiriler. Telegram täze funksiýanyň degişli barlaglary talap edýän ýurtlarda işini dowam etdirmäge kömek etmegine garaşýar.
