Rolls-Royce kompaniýasy özüniň Bespoke atelýesinde gadymy Dunhuana freskleriniň stilinde bezelen üç sany - Phantom, Cullinan we Spectre awtoulaglaryny görkezdi. Müň ýyldanam gowrak ozal döredilen bu gaýa suratlary buddizm sungatyny şöhlelendirýär we Merkezi Aziýanyň taryhy hem-de medeniýeti barada gymmatly maglumat çeşmesi hasaplanýar.
Dunhuan - Hytaýyň Gansu welaýatynyň Szýusýuan şäheriniň töweregindäki oazisdir. Gadymy döwürde ol Beýik Ýüpek ýolundaky Hytaýa girilýän derweze bolup hyzmat edipdir.
Hytaýyň Rolls - Royce ofisi tarapyndan sargyt edilen awtoulaglaryň kuzowy özboluşly reňkleri we bezegi üýtgeşik elementleri aldy. Şeýlelik bilen, Phantom Extended sedany Ningye Purple reňkinde bolup, Beýik Hytaý diwarynyň üstündäki gyrmyzy asmandan we 800-nji ýylyň Tan eýýamynyň şygryndan ylham alýar. Kuzowyň depesi iňlis ak reňkine boýalan. Petigi 1300 optiki süýümli çyralar we 192 sany "süýnüp barýan ýyldyz" bilen bezeldi. Interýerinde budda medeniýetiniň asman jandarlary bolan apsaralaryň şekili bolan, elde nagyşlanan "Galereýa" tapawutlanýar.
Black Badge Cullinan Series II krossoweriniň göwresi, teker diskalary we interýeri gülgüne Danqian Pink öwüşgini aldy. Öňki oturgyçlaryna diametri 0,8 we 1,2 mm bolan 100 müň deşikli Blushing Pink derisi çekdirilendir. Kellegoýarlardaky şekiller Gudwuddaky Rolls-Royce zawodynyň depesindäki bulutlary suratlandyrýar.
Black Badge Spectre elektrik kupesi Dunhuana freskleriniň dag landşaftlaryndan ylham alyp, Qingshan Blue mawy öwüşginine, kuzowynyň depesi gara reňke boýaldy. Interýeri gögümtil-mawy we gara reňkli deriden oturgyçlary, deriden merkezi konsoly we goýun ýüňünden dokalan halyçalary bilen tapawutlanýar.
