Hytaýyň Unitree kompaniýasy täze Unitree R1 gumanoidini hödürledi. Bu döwrebap we arzan robotyň agramy bary-ýogy 25 kg bolup, ol togalanmak we keseligine aşyr atmak ýaly dürli hereketleri ýerine ýetirip bilýär.
Robotyň 26 hereket bogny, şol sanda aýaklarynda 6 bogun, ellerinde 5 bogun we kellesinde hem bilinde 2 bogun bar.
Unitree R1 ses arkaly we wizual dolandyryşy goldaýar. Ulanyjylar onuň özüni alyp barşyny, sesini we daşky görnüşini sazlap biler. Robot ylgamaga, akrobatiki hereketleri ýerine ýetirmäge we hatda söweş tärlerini görkezmäge ukyply. Ol agyr ýükleri götermegi (agramy görkezilmeýär), böwetlerden geçmegi, basgançakdan ýokary galmagy we aşak düşmegi, şeýle-de ýykylandan soň özbaşdak turmagy başarýar.
Unitree şeýle robotlaryň geljek üç ýylyň içinde hojalyga kömek etmek ýa-da garrylara seretmek üçin adamlaryň öýlerinde ýaşap biljekdigini aýdýar. Kompaniýa bir ýylyň içinde R1-i dürli kärhanalara ibermek mümkinçiligini göz öňünde tutýar.
R1-iň bahasy 39 000 ýuana (5 451 dollar) barabar. Hytaýda satuw şu tomus başlar.
