PepsiCo kompaniýasy klassyk Pepsi-niň täzelenen we peýdaly görnüşi bolan Prebiotic Cola içgisini hödürledi. Täze içginiň düzüminde her bankada 3 gram prebiotik bar diýlip, kompaniýanyň resmi saýtynda habar berilýär.
Prebiotikler – bu içegede peýdaly bakteriýalar üçin iýmit bolup hyzmat edýän we olaryň ösmegine hem işjeňligine itergi berýän siňdirilmeýän iýmit komponentleridir. Olar aşgazan-içege ulgamynda siňmeýär-de, ýogyn içegede işläp başlaýar, bu hem mikrobiotany sagdyn saklamaga ýardam edýär we iýmit siňdirişi gowulandyrýar.
Täze içginiň kaloriýalylyk derejesi 30 kaloriýa çenli azaldyldy, onuň düzüminde emeli süýjedijiler ýok, diňe çiňrik şekeri ulanylýar.
“Meşhur gök bankadan başlap, Pepsi Zero Sugar-a çenli biziň önümlerimiz hemişe alyjylaryň isleglerine görä sazlandy. Pepsi Prebiotic Cola – bu öňe indiki ädim: biz alyjylara Pepsi-niň meşhur tagamyny ýitirmezden, saýlamaga mümkinçilik berýäris we peýdaly goşundylary hödürleýäris” – diýlip, ABŞ-da PepsiCo Beverages-iň baş direktory Ram Krişnan belleýär.
Täze içgiler 2025-nji ýylyň güýzünde sekiz bankadan ybarat gaplama görnüşinde satylyp başlanar. 2026-njy ýylyň başynda ol bölek satuw dükanlarynda peýda bolar. Klassykdan başga-da, “ülje-wanil” tagamly görnüş hem hödürlener.
PepsiCo kompaniýasy Lay’s, Doritos, Cheetos, Mountain Dew we SodaStream ýaly brendlere eýeçilik edýär. 2024-nji ýylyň jemi boýunça kompaniýanyň girdejisi 92 mlrd ABŞ dollaryna barabar boldy. PepsiCo önümleri dünýäniň 200-den gowrak ýurdunda hödürlenýär.
