Ispaniýanyň Patyşalyk futbol federasiýasy (RFEF) emeli aň boýunça hünärmen Çema Alonsony eminleriň tehniki komitetiniň (CTA) AI meseleleri we innowasiýa boýunça geňeşçisi edip belledi. Bu barada guramanyň resmi web sahypasynda habar berildi.
Şeýle wezipä bellemegiň maksady - seljeriş gurallaryny we awtomatlaşdyrylan ulgamlary eminlik ulgamyna ornaşdyrmaga gönükdirilendir.
Şol bir wagtyň özünde CTA-nyň beýanynda Alonsonyň anyk oýunlar üçin eminleri bellemäge gatnaşmajakdygy we VAR-yň işine täsir etmejekdigi bellenildi. Marca neşiri Alonsonyň ozal sosial mediada özüni “Realyň” ölemen janköýeri diýip atlandyrandygyny göz öňünde tutup, bu sözleriň ähmiýetine aýratyn üns çekýär.
2011-nji ýylda ol aşakdaky ýazgylary çap edipdi: "Men madridçi, raulçy we ikerçi" (bu ýerde “Realyň” öňki ýyldyzlary - hüjümçi Raul we derwezeban Iker Kasilýas göz öňünde tutulýar).
"Meniň kemçiligim – men taryhyň iň beýik klubunyň muşdagy. Hala Madrid" – diýip, Alonso ýazdy. Şeýle hem, ol klubuň gepleşikler otagynda düşürilen suratlary çap etdi.
Alonso - maglumat ulgamynyň magistri we howpsuzlyk ylymlarynyň doktory. Ol ElevenPaths kompaniýasyny esaslandyrdy we Telefónica kompaniýasynda ýokary wezipelerde işledi, bu ýerde ol emeli aň, uly maglumatlary gaýtadan işlemek we sanly platformalar bilen baglanyşykly taslamalara gözegçilik etdi.
