Milanyň “Inter” futbol kluby Hytaýyň BYD awtoöndürijisi bilen hyzmatdaşlyk şertnamasyny baglaşdy. 2028-nji ýyla çenli niýetlenen hyzmatdaşlygyň çäklerinde kompaniýa klubuň oýunçylary, tälimçiler ştaby we top-menejmenti üçin 70 töweregi elektromobil we gibrid hödürlär.
“Biz innowasiýalara we kämillige ymtylýan iki global brendi birleşdirýän hyzmatdaşlygyň başlandygyny habar bermäge şat. Biz BYD-yň hyzmatdaşlyk üçin ilkinji futbol kluby hökmünde hut “Interi” saýlandygyna buýsanýarys. Bu biziň brendimiziň halkara arenasynda özüne çekijiliginiň barha artýandygyny tassyklaýar” – diýip, “Interiň” täjirçilik ösüşi boýunça müdiri Jorjo Riççi belledi.
Şertnama BYD-yň Ýewropa bazaryna ýaýramak, şol sanda DENZA premium brendini ösdürmek boýunça strategiýasynyň bir bölegi bolar. Klub ilkinji bolup BYD Sealion 7 flagman elektromobiliniň aýratyn görnüşini alar. Soň ol giň köpçülik üçin çäkli tiraž bilen çykarylar.
“Interiň” janköýerleri üçin hem BYD awtomobillerini satyn almak we kärendesine almak boýunça ýörite programmalar taýýarlanýar. Hyzmatdaşlyk bilelikdäki halkara çärelerini geçirmegi we auditoriýany çekmek üçin kontent döretmegi-de göz öňünde tutýar.
“Biz hyzmatdaşlygyň üç möwsümden uzak dowam etmegine umyt bildirýäris” – diýip, Riççi aýtdy.
