Denweriň Tebigat we ylym muzeýiniň duralgasynda buraw işleri geçirilýärkä dinozawryň süňküniň galyndylary tapyldy. Tapyndynyň ýaşy, takmynan, 67 million ýyl töweregi diýip, CBS News habar berýär.
Süňk muzeýi geotermal ýyladyşa geçirmek boýunça işleriň alnyp barylýan ýerinde 230 metr çuňlukdan tapyldy. Muzeýiň paleontologlary munuň hek döwrüniň ahyrynda, köpçülikleýin ýok bolup gitmäniň öň ýanynda ýaşap geçen ot iýýän dinozawryň oňurgasynyň bir bölegidigini kesgitlediler.
Alymlaryň belleýşi ýaly, şeýle galyndylaryň şunuň ýaly çuňlukdan we dinozawrlara ýöriteleşen muzeýe ýakyn ýerden tapylmagy gaty seýrek hadysadyr. Bu işe gözegçilik edijiler şeýle tapyndynyň ähtimallygyny bijäň çykmagy bilen deňeşdirdiler.
Süňküň bölegi diametri 5 santimetr töweregi bolan hokkeý şaýbasynyň şekilinde. Ol Denwer sebitinden tapylan iň gadymy dinozawr galyndysy hasaplanýar. Golaýyndan ösümlik galyndylary hem tapyldy, bu şäheriň häzirki duran ýeriniň öň batgalyk ýer bolandygyny görkezýär.
Tapyndynyň ylmy gymmatlykdygyna garamazdan, awtoulag duralgasynda giň göwrümli gazuw-agtaryş işlerini geçirmek maksada laýyk däl diýip hasaplandy. Tapylan galyndy häzirki wagtda görkezmek üçin muzeýiň özünde goýuldy.
