Lanzante kompaniýasy 1995-nji ýyldaky “Le-Manyň 24 sagady” ýaryşynda McLaren-iň ýeňşiniň 30 ýyllygynyň hormatyna döredilen üç orunlyk 95-59 superkaryny görkezdi. Bu model hersiniň bahasy 1 million funt sterling bolan (1,355 million dollar töweregi) 59 sany çäkli nusgada öndüriler.
Daşyndan seredeniňde 95-59 McLaren 720S/750S-e meňzeýär (onuň işlenip taýýarlanyşyna kompaniýanyň öňki dizaýneri Pol House hem gatnaşypdy), ýöne awtoulag noldan guruldy. Karbon monokok 1 + 2 oturgyç konfigurasiýasyna - merkezde ýerleşýän rula sazlanyldy. Ähli kuzow panelleri ugleplastikadan ýasalyp, bu model üçin ýörite işlenip düzüldi. Awtoulagyň uzynlygy 4574 mm, teker bazasy 2670 mm.
Oturgyçlaryň aňyrsynda McLaren-iň 862 at güýji we 880 Nm bolan dört litrlik goşa turbo V8 ýerleşdirilen. Hereketlendirijisi goşa gysgyçly ýedi tizlikli robot geçiriş guty bilen jübütlenendir, hereketlendirijisi - yzky. Gibrid komponentler göz öňünde tutulmadyk.
Goşmaça LM30 bukjasy bar. Ol ýeňil komponentleri oturtmak arkaly awtoulagyň agramyny 20 kg azaldýar. Netijede, güýç-agram gatnaşygy bir tonna 700 at güýjüne ýetýär - bu McLaren P1-iňkiden köp.
Dizaýnerler superkaryň diňe bir tizlik üçin däl-de, eýsem işleýşiniň we tehniki hyzmatynyň aňsat bolmagyna hem üns berlendigini nygtaýarlar.
