Irkutsk şäherinde (RF) «Ýüpek ýoly» atly 15-nji halkara rallisi-marafony başlandy. Bu ýaryşa Türkmenistanyň adyndan T2 seriýaly wnedorožnikler synpynda çykyş edýän üç ekipaž gatnaşýar.
Türkmenistanyň awtosport federasiýasyndan bu synpda şu aşakdaky ekipažlar wekilçilik edýär:
- 2022-nji ýylyň ýeňijileri we 2023-nji ýylyň kümüş medal eýeleri doganlar Merdan we Şöhrat Toýlyýewler (ýaryş belgisi — 214);
- geçen ýyldaky bäsleşigiň bürünç medalçylary Maksatmyrat Daňatarow we Didar Orazmedow (215);
- Meýlis Abdullaýew bilen Italmaz Çaryýew (216).
Ýaryşdaky ähli ekipažlar Nissan Patrol ulaglarynda çykyş edýärler we diňe biri-biri bilen bäsleşýärler.
Ralliniň Irkutsk — Baýkalsk (256 km) ugrunda geçirilen ikinji tapgyrynda Toýlyýewler birinji orny eýelediler. Abdullaýew ýeňijilerden bary-ýogy 8 sekunt yza galdy, Daňatarow bolsa 1 minut 15 sekunt yzda galdy.
Üç ekipažyň arasyndaky umumy netije tapawudy 3,5 minutdan hem az. Ilkinji tapgyryň ýeňijisi bolan Daňatarow häzirki wagtda Toýlyýewden diňe 1 minut 15 sekunt yza galýar, Abdullaýew bolsa ondan hem takmynan 2 minut soň gelýär.
Ralli 22-nji iýulda Gorno-Altaýsk şäherinde tamamlanar. Uzynlygy 4811,6 kilometr bolan ýaryş Russiýanyň we Mongoliýanyň çäginden geçýär. Ol Gobi çöli, Altaý daglary we Baýkal köli ýaly ýerleri öz içine alýar. Ýaryşa gatnaşyjylary 11 tapgyr we umumy uzynlygy 2402,33 km bolan ýörite ýaryş bölekleri garaşýar.
