Asly Britaniýadan bolan fransiýaly aýdymçy we aktrisa Jeýn Birkine degişli bolan ilkinji Hermès Birkin ýantorbasy Sotheby’s auksionynda komissiýa tölegleri bilen birlikde rekord 10 mln dollara (8,6 mln ýewro) satyldy.
Söwdada ýeňiji Ýaponiýadan bir kolleksioner boldy.
Bellenilişi ýaly, ýantorba 1985-nji ýylda aktrisa üçin ýörite bir nusgada döredildi. Giňden ýaýran maglumatlara görä, Birkin Hermès-iň başlygy Žan-Lui Dýuma bilen bir uçara münüp, oňa ýeterlik derejede sygymly zenan torbalarynyň ýokdugyndan zeýrenipdir. Şonda Dýuma göni uçaryň bortunda torbanyň eskizini çekipdir.
Soňra käbir üýtgeşmeler bilen torba modeli köpçülikleýin önümçilige goýberildi.
Auksionda satylan torba häzire çenli söwda çykarylan iň gymmat ýantorba boldy. Ozal rekord krokodil derisinden taýýarlanyp, göwher bilen bezelen Hermès Kelly torbasyna degişlidi ($513 müň).
Mundan başga-da, Birkin ýantorbasy köpçülikleýin auksionlarda satylan moda pudagy bilen bagly ikinji iň gymmat predmet boldy diýip, People belleýär. Birinji orny 1939-njy ýylyň “Oz ýurdunyň jadygöýi” filminden gyzyl köwüş eýeleýär. 2024-nji ýylda bu köwüş ABŞ-daky auksionda 32,5 mln dollara satyldy.
