Ýewropanyň kosmos agentligi (ESA) köp gezeklik Space Rider kosmos enjamynyň paraşýut ulgamynyň synaglaryny üstünlikli geçirdi. Synaglar italýan harbylarynyň gatnaşmagynda we taslamanyň baş potratçysy bolan Thales Alenia Space kompaniýasynyň inženerleriniň ýolbaşçylygynda Sardiniýada geçirildi.
Maket 2,5 km çenli belentlikden dikuçardan zyňyldy we onuň näderejede takyk gonýandygy, paraşýutlaryň açylyşy we paraplanyň kömegi bilen aşak nähili düşýändigi barlandy. Asuda gonuş 150 m çenli takyklyk bilen mümkin boldy – bu paraplanda awtonom gonuş üçin iň gowy netijedir. Modeliň ortaça dik tizligi 4 m/s boldy, Ýere gonuş 2 m/s tizlikde bolup geçdi.
Space Rider orbitada ylmy tejribeleri geçirmekden başlap, ýük çykarmaga çenli dürli işleri ýetine ýetirmek üçin niýetlenendir. Ol üç aýa çenli uçuşda bolup, täze nesil paraşýut ulgamynyň kömegi bilen Ýere dolanyp bilýär. Gonuş üçin ilki korpus bilen tormoz berme, soňra paraşýut we esasy paraplan ulanylýar.
Kosmosa uçuşdan öň ýene iki tapgyr ýerüsti synaglar meýilleşdirilýär. Olaryň dowamynda ýokary temperatura we agdyk güýç şertlerinde peýdaly ýüküň doly saklanmagyna aýratyn üns berler.
Enjam çalt taýýarlyk üçin niýetlenendir – her missiýanyň aralygynda bary-ýogy alty aý töweregi tehniki hyzmat gerek bolar.
