Mattel kompaniýasy taryhda ilkinji gezek 1-nji görnüşli diabetli (süýji kesel) Barbie gurjagyny hödürledi diýip, The Guardian neşiri habar berýär. Täze gurjak «Breakthrough T1D» atly täjirçilik däl gurama bilen bilelikde taýýarlanyp, ol çagalaryň özleri bilen oýunjaklaryň arasynda bir umumylyk tapyp bilmegi üçin döredilipdir. Bu brendiň inklýuziwlige bolan ymtylmasyny görkezýär.
Gurjagyň golunda gülgüne ýürek şekilli lukmançylyk lentasy bilen berkidilen glýukoza monitory (gandaky şekeri ölçemek üçin ýörite enjam) bar, şeýle hem insulini awtomatiki usulda berýän insulin pompasy (nasosy) bar. Şonuň bilen bilelikde, gandaky şekeriň derejesini gözegçilikde saklaýan programma üpjünçiligi bolan smartfon we zerur zatlary saklamak üçin torba hem topluma girýär.
Mattel-niň wekilleri şeýle gurjagyň diabetli çagalara özleriniň kabul edilýändigini we hemmeleriň olaryň ýagdaýyna düşünýändigini duýmaklaryna ýardam berýändigini aýtdylar.
Barbie Fashionistas hatarynda häzirki wagtda 175-den gowrak görnüş bar. Olaryň arasynda maýyplygy bolan, dürli daşky keşpli we etniki gelip çykyşly gurjaklar hem bar. Mattel ozal Daun sindromly, protezli, witiligoly (derisi tegmilli), eşidiş enjamly we görüş kynçylygy bolan gurjaklary hem çykarypdy.
