Hytaýyň ByteDance kompaniýasy diňe bir TikTok sosial ulgamynyň däl, eýsem CapCut wideoredaktorynyň aýratyn wersiýasyny çykarmagy meýilleşdirýär. Olar diňe ABŞ-daky ulanyjylara gönükdiriler diýip, Business Insider habar berýär.
Bu çözgüt ABŞ-nyň täze kanunlaryna laýyklykda TikTok-yň amerikan bölüminiň satylyp bilinmegi bilen baglanyşyklydyr. Gysga wideo platformasynyň täze wersiýasyny 5-nji sentýabrda işe girizmek meýilleşdirilýär, şol bir wagtyň özünde häzirki programma 2026-njy ýylyň martynda işini bes etmeli. Seneler üýtgäp hem biler.
CapCut wideoredaktorynyň amerikan wersiýasynyň çykjak senesi barada maglumat ýok. GooglePlay-de häzirki CapCut milliard gezekden köp ýüklenip alyndy, amerikan App Store-da bu programma meşhurlygy boýunça hatda Instagram bilen YouTube-dan hem öňe geçýär.
Täze programmalaryň işe girizilmegi ByteDance kompaniýasyny ABŞ-da TikTok-dan we beýleki aktiwlerden ýüz öwürmäge borçlandyrýan kanun talaplaryny berjaý etmek boýunça kompaniýanyň strategiýasynyň bir bölegi hökmünde görülýär. Amerikan häkimiýetleri Hytaý hökümetiniň ulanyjy maglumatlaryna elýeterli bolmagyndan ýa-da kontente täsir etmek mümkinçiligine eýe bolmagyndan howatyrlanýar. Kanuny berjaý etmekden ýüz öwren ýagdaýynda TikTok Birleşen ştatlaryň çäginde gadagan edilip bilner.
TikTok-yň amerikan bölümçesiniň satuwy henizem ara alyp maslahatlaşylýan mesele bolup galýar. Mümkin bolan alyjylaryň arasynda Microsoft, Amazon we Frenk Makkortyň ýolbaşçylygynda maýadarlar topary bar. Ozal ABŞ-nyň Prezidenti Donald Tramp platformany satyn almaga taýýar “örän baý adamlar” barada habar berdi we şertnamany ýapmak üçin HHR-iň başlygy Si Szinpiniň tassyklamagynyň zerurdygyny aýtdy.
