Legendary studiýasy “Dýunanyň” üçünji bölüminiň düşürilip başlanandygyny habar berdi. Deni Wilnýowyň ylmy-fantastiki wakasynyň üçünji filmi “Dýuna: Üçünji bölüm” (Dune: Part Three) adyny aldy. Taslama bu at bilen kino auditoriýasy barada maglumatlary ýygnamak we seljermek bilen meşgullanýan Rentrak analitiki kompaniýasynyň bazasynda peýda boldy.
Ozal üçünji bölüm Frenk Gerbertiň 1969-njy ýylda çykan ikinji romany bilen baglylykda “Dýuna: Messiýa” hökmünde görkezilipdi. Ýöne Warner Bros. we Legendary studiýalary has bitarap sözbaşyny ulanmak kararyna geldi.
Variety neşiri filmiň tutuşlygyna däl-de, köp böleginiň IMAX kameralarynyň ulanylmagy bilen düşüriljekdigini habar berýär. Şonuň üçin Kristofer Nolanyň geljekki “Odisseýa” filmi häzirlikçe doly IMAX formatda düşüriljek ýeke-täk taslama bolup galýar.
Režissýor Deni Wilnýow ozal Variety bilen söhbetdeşlikde ilkinji iki bölümi diptih, üçünji filmi bolsa franşizanyň özbaşdak bölümi hökmünde kabul edýändigini aýtdy. Režissýoryň aýtmagyna görä, “üçünji bölüm özboluşlylyga eýe bolar. Şeýle-de, ol munuň “Dýunanyň” çäklerinde iň soňky film boljakdygyny belledi. Ýöne hünärmen Warner Bros. we Legendary studiýalarynyň franşizany beýleki režissýorlar bilen dowam etdirjekdigine ynanýar.
Sosial ulgamlarda Wilnýow surata düşüriş meýdançasyndan ilkinji suraty hödürledi, onda çöl peýzažy şekillendirilen.
“Dýuna: Üçünji bölüm” filminiň premýerasy 2026-njy ýylyň 18-nji dekabryna meýilleşdirilýär.
