15 ýaşly Käkilik Derýaýewa kadetleriň arasynda geçirilen Aziýa Kubogynda bürünç medal gazandy. Bu halkara ýaryş Gazagystanyň Almaty şäherinde geçirilýär.
Türkmenistanly türgen 48 kilogram agram derejesinde çykyş etdi. Bu agramda bäş ýurtdan 25 türgen bäsleşdi.
Aşgabatdaky 37-nji orta mekdebiň 10-njy synp okuwçysy bolan K.Derýaýewa dört duşuşykda ýeňiş gazandy. Ilkinji tapgyrda ol Özbegistandan Sarwinoz Abdusamadowany tutluşygyň 36-njy sekuntynda ýeňdi. Soňra mongoliýaly Hongorzul Ariunzorigden üstün çykdy. Çärýek finalda bolsa Özbegistandan Nargiz Dustmamtowadan ýeňildi.
Emma utuk berýän tapgyrda ol ýene iki ýeňiş gazandy — ilki bilen Özbegistandan Zarnegor Ullaşowany, soňra bolsa bürünç medal ugrunda Gazagystandan Zlata Şwaýgerti ýeňip, üçünji orna mynasyp boldy.
Şu agram derejesindäki beýleki bürünç medal hem Nargiz Dustmamtowanyň paýyna düşdi. Özbegistanyň wekili Gulmira Holmurzaýeva altyn we Gazagystandan Asel Ruslanowa kümüş medalara eýe boldular.
Käkilik Derýaýewa dzýudo bilen 2019-njy ýyldan bäri meşgullanýar. Onuň ilkinji tälimçisi Batyr Annaýew boldy. Häzirki wagtda ol dünýä çempiony Gülbadam Babamyradowanyň we Türkmenistanyň zenanlar ýygyndysynyň baş tälimçisi Tatýana Widýasowanyň ýolbaşçylygynda türgenleşýär.
Kadetleriň we ýaşlaryň arasynda geçirilýän Aziýa Kubogyna 11 ýurtdan jemi 788 türgen gatnaşýar. Türkmenistana bolsa 31 dzýudoçydan ybarat ýygyndy wekilçilik edýär.
