Telegram messenjerinde maglumatlaryň dogrulygyny barlaýan ýerli mehanizm peýda boldy. Täze funksiýany ilkinji bolup «Kod Durowa» sahypasynyň redaksiýasy ýüze çykardy. Mundan ozal şol sahypa Telegram-da faktçekingiň işe girizilip bilinjekdigi barada habar beripdi, indi bolsa onuň işleýändigini tassyklaýan ilkinji subutnama peýda boldy.
Telegram topary bu barada entek resmi düşündiriş bermedik bolsa-da, täze mehanizm käbir kanallarda eýýäm peýda bolup başlady. Mysal üçin, We TON atly jemgyýetçilik kanaly «Panorama» neşirinden Pawel Durowyň messenjeri taşlamagy meýilleşdirýändigi baradaky satiriki habary paýlaşdy. Şol habaryň aşagynda «Faktlaryň barlagy» diýen bellik peýda boldy we ondan maglumatlaryň hakykata laýyk gelmeýändigi düşündirildi. Şeýle-de ýörite bölümde Telegram-yň wekilleriniň bu habaryň ýalanlygyny tassyklaýandygy görkezilýär.
Bu funksiýanyň ornaşdyryljakdygy barada «Kod Durowa» eýýäm 2024-nji ýylyň maý aýynda habar beripdi. Şonda ýazylan maglumatlara görä, habarlaryň barlagyny ýöriteleşdirilen agentlikleriň amala aşyrjakdygy we ulanyjylaryň bu prosese goşulyp bilmejekdigi aýdylýardy.
Şeýle-de bolsa, bu funksiýa häzirlikçe kämil işlemeýär. Ilkibaşda ulanyjylar «Faktlaryň barlagy» bloguny islendik habara goşup bilýärdiler. Munuň üçin şeýle bellikli habary başga bir çata ugratmak, awtorlygyny öçürmek, redaktirlemek we täzeden paýlaşmak ýeterlikdi. Bu ýalňyşlyk eýýäm düzedildi, ýöne gysga wagtyň içinde ulanyjylar köp sanly galp «ýalana çykarylan» memleri döretmäge ýetişdiler.
