BTS K-pop topary harby gulluk sebäpli ýüze çykan arakesmeden soň döredijilik işine gaýtadan başlady. Topar täze albomyň üstünde işläp başlandygyny we onuň reliziniň 2026-njy ýylyň ýazyna meýilleşdirilendigini aýtdy diýip, CNN habar berýär.
Anons Hybe kompaniýasyna degişli bolan Weverse platformasynda göni ýaýlymda edildi. Oňa toparyň ýedi agzasynyň ählisi gatnaşdy: Kim Sok-çin (Jin), Pak Çi-min (Çimin), Çon Ho-sok (Jeý-Houp), Kim Nam-jun (RM), Kim The-hýon (Wi), Çon Jon-guk (Çonguk) we Min Ýun-gi (Şuga). Bu olaryň 2022-nji ýylyň sentýabryndan bäri ilkinji bilelikdäki ýaýlymy boldy.
Topar albomy ýazmaga ABŞ-da eýýäm şu aýda başlar. Olaryň aýtmagyna görä, täze albom toparyň ähli agzalarynyň pikirlerini we garaýyşlaryny şöhlelendirer.
Mundan başga-da, BTS 2026-njy ýylda başlajak dünýä boýunça konsert syýahatyny anons etdi. Bu soňky dört ýylda ilkinji syýahat bolar. Geljekki albom Proof ýygyndysyndan (2022), ýapon dilindäki BTS, the Best albomyndan (2021) we Be studiýa albomyndan (2020) soň ilkinji reliz bolar.
Belläp geçsek, Günorta Koreýada işe ukyply 18 – 28 ýaş aralygyndaky ähli erkek adamlar 18 aýdan 21 aýa çenli harby gullugy geçmeli.
